MENU LOG IN CART {{currentCart.getItemCount()}}

關於Remember

Remember係2012年由一個超級購物狂既女人😅純粹因為鐘意買野,見之前幫襯既鋪頭都唔辛苦丫🤔膽粗粗之下係一個非常非常細既鋪開始佢既夢,一個滿足佢購物慾既夢......

由租鋪簽約,裝修,入貨乜都唔識,唔怕經歷跌跌撞撞,身邊不停有朋友幫忙,終於呢個女人既夢開始了~ 當初係呢唔夠一百尺既空間,呢個女人付出一百分熱誠,熱切,心機

仲記得當時同靚靚吹水時傾過,我想有一間可以放sofa既鋪,可以坐低吹水,靚靚話:「香港好難租咁貴,他日如果有能力你會放多個架放貨啦!」我當時只係希望自己唔會改變....因為呢個女人除左買野,就最鍾意同人吹吹水

還好多得大家既支持,半年後呢個女人已經唔甘於揾香港agent拎貨,決定要自己✈去🇰🇷搵大家想要既野,保證大家一定買到「真真正正」既made in Korea 🇰🇷靚野💪🏼

同時發現當初以為開鋪好free,見人地都係上網睇下戲咁,原來呢個女人太天真了,鋪頭每日工作,收工仲要分貨,檢查貨,pack 貨,send out等等,仲有Facebook msg要覆,每日都做到零晨4、5點😱
仲要呢個女人一份堅持,無論幾辛苦,幾攰,都一定每件衫都檢查過都剪過缐,呢個女人認為如果佢自己收到件衫都希望靚靚仔仔,所以無論點都要堅持

唔係鐘意呢個夢已經醒左唔會再發落去

一直係呢個陝細既地方每日營營役役,開始失去當初既熱情,當初既初心,亦失去當初既笑容,呢個女發現唔可以再咁落去.....2015年決定搬去一個更大既地方,希望可以係呢個500尺既全新Remember搵返自己,可以減輕工作量,當然唔可以漏左呢個女人夢想既sofa la😝可以舒服地同上黎既靚靚不停吹水😂
感謝CEO同朋友既努力同心機帶黎我好喜歡既全新Remember

一直都話香港小店好難生存,租金人工確實太貴,就算你俾得起租金唔代表業主租俾你😰惡夢發生係2年後既2017年年頭業主唔肯再租,天呀🤯我準時交租都租唔到?!呢個咩世界呀😨對呢個女人極大打擊,因為撞正過年時間迫切,就算俾你搵到鋪都無裝修師傅開工🤦🏻‍♀ 無左間鋪d野放邊?張sofa呢?有一百個問號❓還好呢個女人家有個樂觀既CEO去開解、去解決所有問題~ 而呢個女人重新係迷失中企返起身,將Remember轉身為一間online shop, 亦將鋪改為workshop! CEO仲努力帶返一間一模一樣既Remember俾呢個女人

做左純online差不多大半年,仍然得到大家既信任,呢個女人繼續飛韓國,繼續post新貨😌去到年尾呢個女人爭扎左好耐,今年仲做唔做佢熱愛既皮褸呢?!🤔 workshop無咁方便大家試,皮褸咁貴點好呢?!但又不停不停收到靚靚inbox我,問「幾時有皮褸睇?」「今年有皮䄛嗎」「Carmen我等左好耐喇」呢個女人終於係最尾果個moment終於都post相,感謝大家對我絕對既信任同絕對既支持🙏🏼皮褸係咁短既截單時間,都大力💪🏼支持!大家感激大家呀😘


臨過年前既1個半星期呢個女人發現,原來囗中既人體極限,(飛韓國🇰🇷之前連踩2日通宵,再零晨機飛韓國原來並唔係🙅🏻‍♀人體極限🤷🏻‍♀ 

果段時間真係好瘋癲,晏晝坐係度不停手覆msg,打order可以做到第二日8am,係唔係5am果種通頂,係日日朝日8am🙈,連續十日😱so crazy🤦🏻‍♀ 但每一日雖然攰,但真係好開心,亦因為開心先可以咁踩法~ 去到年廿七終於返貨既日子,其實之前已經預見有幾艱巨,所以一早做定預備工作令流程更順𣈱,但可惜我只係肉血之驅,連續踩左咁多日終於發燒了🤒但我承諾過只要返到貨一定盡趕俾大家過年前,我同CEO2個人4隻手不斷做,唯一我地仍然堅持每一件item都一樣檢查好先俾大家,呢個亦係Remember呢5年既堅持💪🏼

CEO做到天光返去瞓個半鐘就返工,呢個燒到102度既女人繼續努力,係workshop瞓左半個鐘,一直奮戰到第二日7pm,做左32個鐘終於終於可以收爐喇~

呢個女人過年之後好似偷懶,一直遲遲都唔post新貨,但其實為左提供更好既Remember偷偷努力中,直到今日第二個BB—Remember既website 出世喇👏🏼👏🏼 呢個女人真係為左更好既Remember不停努力努力再努力

5年光景話長唔長,話短唔短,當中遇到唔同既事,亦有人淡出,有人入黎陪我一齊行,每一點一滴,全部記得在心頭
其待Remember之後每一個故事,都希望有您係𥚃面,有您既參與,有您陪呢個女人繼續呢個夢.....